سكريبت " أم مع إيقاف التنفيذ " بقلم شيماء الصيرفي
_ طب عشان خاطري متوجعيش قلبي دموعك بتوجعني.
_ حاضر، بس أخرجلها هي لسه عروسة، متنساش إنها لسه صغيرة مش هتبقى متفهمه الوضع زيي.
_ ربنا يديمك ليا يا فرح حياتي.
بوست ايده.
_و يباركلي في عمرك.
منكرش إن الوضع كان صعب عليا أوي، صعب إن أتكيف معاه، بس كنت بعمل المستحيل عشان أتعود، وفعلًا هاجر بنت طيبة جدًا عمرها مجرحتني بكلمة، كانت متفهمه جدًا، عارفة قد ايه انا وجاسر بنحب بعض، حكايتنا هي الاشهر في المنطقة مكانتش بتغير لما بتسمعه يقولي كلمة حلوة بل كانت تضحك وتهزر.
_ مالك يا هاجر.
_ باين إني أخدت دور برد لما قعدت بليل في البلكونة، ياريتني سمعت كلامك يا فرح.
_ هدخل أعملك حاجة تدفيكي.
_ أعمليلي حلبة بحبها.
_ أنتِ عكس البشر يا هاجر، في حد بيحب الحلبه.
_ بتدفيتي.
_ من عيوني.
دخلت عملتها كوباية حلبه وأول ما دخلت عليها وماعطيها الكوباية، مسكتها بس مقدرتش تشربها وجريت علىٰ الحمام بسرعة.
_ أنتِ كويسة.
مسحت بوقها وردت بصوت باين عليه التعب.
_ أه الحمد لله.
_ إيه اللِ حصل.
_ أول ما شميت ريحتها نفسي قلبت.
رديت بتوتر
_ طب إيه الأعراض اللِ عندك.
_ همدانه أوي وحاسه ان جسمي متكسر.
بصيتلها بفرحة.
_ ممكن يبقى حمل، قومي قومي البسي نروح معمل ولو ماطلعش حمل نروح نكشف عليكِ.
روحنا المعمل أخدوا منها عينه دم، قالوا النتيجة بعد ساعة، قعدنا مستنينها كنت بدعي من كل قلبي، فضلت أقول يا رب تبقى حامل يا رب فرح قلب جاسر بكرمك.
_ اهدي مالك متوتر ليه.
_ نفسي تفرحي جاسر يا هاجر هو يستاهل الفرحة دِ.
نهيت جملتي ولاقيت البنت خرجت وفي إيدها التحليل، جريت عليها، أخدت من ايديها الملف وبصيت فيه بلهفه.
_ إيجابي، إيجابي يا هاجر يا كرمك يا الله.
كنت فرحانه وببكي من الفرحة، أخيرًا بيتنا ربنا هيزينه بالأطفال، أه مش مني بس هيبقوا ولادي برضو.
