سكريبت " أم مع إيقاف التنفيذ " بقلم شيماء الصيرفي
_ صباح الخير.
_ صباح النور صباحية مُباركة يا أحلى عروسة.
بصيتلي بكسوف
_ الله يبارك فيكِ يا أبلة فرح.
_ أبلة ايه بقا، خلاص أحنا بقينا زي بعض راسك براسي، غير كِدَ أنا بعتبرك أختي الصغيرة بلاش ابلة دِ.
_ هحاول بس هيبقى صعب أنتِ أحترامك واجب فوق دماغي.
_ أصيلة يا هاجر؛ يا خبر في عروسة يوم صابحيتها تلبس عباية، أدخلي غيري هدومك بسرعة البسي حاجة بيتي حلوة كِدَ، أنا أهو قدامك لابسه بيجامة وأنتِ العروسة لابسه عباية، بعدين إحنا مش عاوزينه يبص برة.
نهيت جملتي وأنا بغمزلها بعيوني.
بدلت هدومها وخرجت تاني...
_ حلو كده.
_ حلو يا ست العرايس.
_ أنت بتعملي ايه كِدَ.
_ بجهز الفطار.
_ كنتي تستنى نعمله سوا.
_ خلصت خلاص، ادخلي نادي جاسر من أوضة المكتب، بس خبطي براحة عشان هو بيحب يقعد مع المصحف في هدوء خاصًا يوم الجمعة.
_ حاضر.
راحت هي تناديه وأنا رصيت الاكل؛ خرج معاها وأول مشاف الفطار قال....
_ ايه دَ فطير.
رديت عليه وقولت....
_ اه، صحيت من بدري مخصوص عشان أعمله.
_ تسلم ايدك يا حبيبتي.
بصيتله بكسوف وشاورت بهدوء علىٰ هاجر بس دِ عادته لما اعمل الاكل بيبوس دماغي.
_ اقعدي يا هاجر.
_ حاضر يا أبلة فرح.
_ وانتِ رايحه فين!
قالها جاسر لما لقاني بتجه لـ أوضتي.
_ بالهنا أنتو أنا سبقتكم هدخل أقرأ سورة الكهف.
مستنيش رده، دخلت بسرعة قبل مادموعي تنزل وتفضحني؛ متميتش دقايق لاقيته دخل وأول مشافني شديني لحضنه، مصدقت لاقيته ودفنت نفسي جواه وببكي.
_ أنا أسف، أسف لكل الوجع اللِ أنتِ حاسه بيه دَ.
خرجت من حضنه، بصيتله وعيوني كلها دموع.
_ متعتذرش دَ حقك، بس كل حاجة في أولها بتبقى صعبة، صدقني هفضل أعاملها زي مبعاملها دلوقتي، أنا عارفة إنها هتبقى أم ولادك وأهم مني.....
_ شششش أسكتي خالص، مفيش واحده علىٰ الكوكب دَ أهم منك، أنتِ الوحيدة اللِ قلبي بيحبها يا فرح، هتفضلي أنتِ الأهم عندي لو حابه أطلقها بعد منخلف هط...
_ لا لا أوعى تفكر في دَ حرام عليك، كِدَ هتظلمها ومش هتعدل.
