رواية فيلا نوال بقلم كوكي سامح كاملة من الفصل الأول إلى الفصل الأخير

رواية فيلا نوال بقلم كوكي سامح كاملة من الفصل الأول إلى الفصل الأخير

اليوم ده كانت المطره مغرقه الدنيا كلها ومنظر البرق وصوت الرعد يخوف وكأنه بيقول إنذار🔥

.. يلا علشان نتعشى يا عنان وادخلى يا بنتى من البلكونه الجو تلج

.. نتعشى ايه جبنه ولا بيض ولا فول كالعاده

.. كله نعمه من عند ربنا يا بنتى

.. ربنا مش حاسس بينا يا ماما

.. انتى هتكفرى يا بنت بطنى استغفرى ربك

.. انا حتى تعليمى مش عارفه أكمله ولا عارفه اخرج ولا اللبس ولا اعيش زى البنات انا حته بت شغاله فى محل بيتزا وقاعده على الكاشير هى دى شغلتى فى الحياه ده حتى الجواز مش عارفه اتجوز ولا اجهز نفسى زى اى بنت لازم أشقى واتعب علشان اجيب شويه حاجات بالقسط ده حتى القسط بيمصوا دمنا فيه مش بيرحمونا

.. لا حول ولا قوة الا بالله انا مش عارفه انتى طالعه لمين كده

.. الفقر اكل من جتتنا رقات انا اللى بخرج وبشوف الدنيا الناس مش عايشه زينا عارفه يا ماما انا ساعات بحسد اى بنت على ضحكتها بقول انها مش شايله هم الدنيا وراها اب وام يسندوها

.. الله يسامحك يا بنتى انا خارجه اتعشى بيض وفول

.. وانا هنام احسن

=والام خرجت وعنان نامت لتانى يوم

وفى صباح اليوم التالى عنان صحيت ولبست وراحت شغلها من غير فطار متمرده على عيشتها ولما راحت محل البيتزا وقعدت على الكاشير

.. صباح الخير يا عنان مالك مكشره ليه

.. صباح النور يا مها

.. تفطرى معايا

.. ياريت بس بلاش بيتزا لأنى مأكلتش من امبارح وهتعب منها

.. اممم عرفت قرفانه ليه اكيد اتخانقتى مع طنط

.. اه اتخانقت مع ماما والله امى دى ست بركه مش حاسه بالدنيا

.. ما انا قولتلك فى ايدك تعيشى ملكه

.. اه اتجوز بالمده صح ولا اتجوز راجل سعودى اعيش معاه يومين بالفلوس ويسبنى بعد ما يشبع منى

.. لا لا فى حاجه تانيه خالص

.. فى ايه ؟

.. فاكره نوال

.. نوال مين؟

.. نوال هانم صاحبه معارض الموبيليا المشهوره اللى كانت امى بتروح تخدم عندها