رواية الصديقتان كامله جميع الفصول بقلم منى محمود
كان كل شيء طبيعي لحد اخر يوم ليهم هناك كلمتها وحسيت من صوتها أنها متوترة حاولت افهم مالها معرفتش طلبت منها تتصرف وتكلمني وهي لوحدها وحصل فعلا اليوم دا علي المغرب كدة لاقيتها بتتصل بيا...
رديت علي اتصالها بسرعه وانا متوترة اكتر منها من شدة خوفي عليها ومليون سيناريو كانو في دماغي
فلاش باك
ردة بلهفه:
_ الو.. ضحي في ايه مالك ؟ انتي كويسه ؟
ضحي بصوت واطي ومتوتر:
_ رغدة انا بكلمك من الحمام وممكن يحيي ياخد باله في اي وقت.. ا انا بصي م مفيش حاجة انا بس يعني
رغدة بحزم:
_ طالما يحيي ممكن ياخد باله يبقي قولي علي في ايه حصل ؟ اتكلمي يا ضحي
ضحي بصوت مخنوق:
_ا اصل يحيي اتعرف علي ناس هنا متجوزين ج جديد ز زينا يعني ب بس انا مش مرتاحة ف تعامل معاهم ووخايفه اوي منهم ويحيي عمال يقولي بيتهيالك م مش عارفه بقا
رغدة اتنهدت بارتياح:
_حرام عليكي خضتيني عليكي ومليون سيناريو كان لي في دماغي.. حبيبتي انتي طول عمرك مش بتعرفي تتعاملي مع حد جديد بسهوله فاكرة في الجامعه... ف اللي انتي حسه بيه دا طبيعي يا قلبي متقلقيش كدة وتتوتري كلنا جمبك ومعاكي... روايات مني محمود
ضحي بصوت باكي:
_تلاقيهم بيقولوا عليا عبيطة صح...
رغدة كشرت:
_من دي اللي عبيطة دا انا كنت مسحت بكرامتهم الأرض... اهدي يا عروسه كدة... هتتحركو امتي من عندكم ؟
ضحي مسحت دموعها:
_كمان تلت ساعات هنمشي
رغدة:
_توصلو بالسلامة يارب ولو اي حد ضايقك بكلمة ابعتلي مسج بس وانا وهتصرف كله الا ضحي قلبي متعيطش ابدا ابدا
ضحي ابتسمت:
_ربنا يخليكي ليا يارب
رغدة بحب:
_ويخليكي ليا يا قلبي يلا اقفلي عشان يحيي ميخدش باله ويسالك اوك
ضحي:
_ اوك باي باي
رغدة:.
_سلام
باك...
رغدة كملت:
_ بعد ما قفلت معاها مفروض كنت احس بارتياح لكن معرفش ليه فضلت قلقانة عليها وفي حاجة جوايا قالتلي أن ضحي خبت حاجة عليا حاولت اتجاهل الاحساس دا بس مقدرتش.. رجعو من السفر ولاحظت أن ضحي بتحاول تبين أنها سعيدة ولاني حفظاها كويس اوي كان سهل عليا اعرف أن دا تمثيل ومش حقيقي..
حاولت كتير افهم منها في ايه لكن كل مرة كانت بتتهرب من الكلام معايا لوحدنا ودا كان بياكدلي اكتر أن في حاجة هي مخبياها عليا ... عدي شهر كامل شهر ضحي بتتهرب من الكلام معايا لحد ما في يوم اتصلت ب يحيي كاني بسلم عليه عادي ولما اتاكدت أنه نزل شغله
قطعتها بهدوء:
_هو كان شغال ايه ؟
رغدة:
_كان عندة محل قطع غيار سيارات هو واحد صحبه ف كان اوقات نزوله من البيت مش معروفه عشان كدة اتصلت اتاكد هو فين ولما اتاكدت خدت إذن من شغلي بسرعه وطلعت علي ضحي من غير ما اقول لاي حد.. اول ما فتحتلي اتصدمت من وجودي وثواني والصد@مة اتحولت ل قلق.. روايات مني محمود
فلاش باك...
رغدة بهدوء:
_ هو انا هفضل واقفه علي الباب ولا ايه يا ضحي ؟
ضحي بقلق:
_ في ايه ؟ جيالي وسط النهار والمفروض انك في شغلك (عينيها دمعت) تيتا جرالها حاجة ؟ هي هي كويسه صح ؟
رغدة بسرعه:
_تيتا كويسه جدا والله انا جيالك اتكلم معاكي مش اكتر والله تيتا كويسه يا حبيبتي متقلقيش كدة
ضحي حطت ايديها علي قلبها:
_حرام عليكي يا رغدة خضيتني والله
رغدة وهي بتدخل وتقفل وراها:
_ انا جيت جمبك يا بنتي انتي اللي قلقتي من غير ما اتكلم نص كلمة حتي
