رواية اتقابلنا صدفة

لا مش قصدي كدا..قصدي انت ليه تجيبلي هديه انت جوزي؟ يوووه..جايب هديه ايه وريني

= دبش..دبش كتير طفح في وشي..هو انا بقولك تعالي نروح اوضه في فندق؟

- احترم نفسك!

= اسف مقصدش، اتفضلي

لقيته جايبلي روايه لـ حسن الجندي، فرحت..اول مره يجيلي هديه..فضلت بصاله وساكته

- ايه عجبتك؟

= مش عارفه اعبر بس انا حقيقي مبسوطة

- ضحكتك حلوه..افضلي اضحكي ديمًا

= لا انا بحب اعيط

- يلا يابت روحي العبي بعيد، انا ماشي علشان متأخرش، خلي بالك من نفسك، بالمناسبه..شعرك شكله حلو اوي النهاردة، سلام

فضلت بصاله وهو ماشي وحسيت قلبي طاير من الفرحة، كنت ماسكة الروايه في ايدي اليمين وبلعب في شعري بايدي الشمال..

- صدقيني مش بايدي ياهدي..مش هفضل هناك اكتر من 3 شهور والله

= وهما 3 شهور دول شويه؟ 
هقعد 3 شهور اشرب نسكافية لوحدي؟ 3 شهور مبشوفكش؟ طب وارخم علي مين؟ افقع مراره مين؟ 
اروح اجيب حد مالشارع ارخم عليه؟ 
كنت عارفه اني ولا حاجه بالنسبالك..
يا غيث لو رايح تركيا تتجوز هناك قولي وانا مش هتخانق معاك صدقني؟ انت متجوز ومخلف هناك ومخبي عليا صح؟ صداقتنا مش مهمه بالنسبالك؟ مفكرتش فيا قبل ما توافق علي السفر؟ دول 3 شهور بحالهم ياغيث!

= هدي انا بحب اشوفك..بحب اشوف ضحكتك..
بحب شعرك وهو سايب كدا وشكله جميل..
بحب اتكلم معاكي، اكيد مش هسيب كل دا بمزاجي كدا..
انا فعلًا محتاج السفرية دي وغص0ب عني مضطر اروح

- طيب وجاي تقولي ليه؟ عايز تضايقني وخلاص؟

= يوووه..طيب ياهدي انا غلطان اني جيت قولتلك واسلم عليكي قبل ما امشي..انا ماشي..سلام

- طيب،امممم..اتنيل خلي بالك من نفسك

ضحك وقالي حاضر

لما مشي اخدت حاجتي ورجعت البيت وفضلت اعيط، قررت اني مش هروح الكافيه غير لما الـ 3 شهور يعدوا 

اول ما الـ 3 شهور عدوا روحت الكافية بس ملقيتهوش..فضلت قاعده مستنياه كتير بس مجاش

- اي ياقمر مكشره ليه؟ اتأخرت عليكي صح؟ 
اسف بس كنت بجيب حاجة

= اتخضيت عليك افتكرتك مت

- يارب ارحمني من الدبش دا

= بلا دبش بلا نيله دلوقتي، تعالي نقعد فالكافيه نتكلم جوا دا انت وحشتني اوي

- لا كافيه ايه دلوقتي..تعالي هاخدك مكان بحبه

= بتستدرجني علشان اروح شقتك صح؟ 
لا مش انا يا استاذ..شوف واحدة من الشارع هي اللي تروح معاك انا بنت ناس متربيه

- دماغك هتفضل شمال كدا كتير؟

= لا انا كنت بهزر..انت شاب محترم متعملش كدا

- طيب يلا تعالي 

اخدنا تاكسي وروحنا عند النيل